Борз уг1уш хезначохь чанг1алкхаш ц1ийзош,
Къонахий леллачохь тодакхаш хьийзаш,
Стогаллин аганахь лайн амалш техкош,
Х1ун кхане лоьху ахь, сий долу Нохчийн къам?
Йишин сий дицдинарш эхь-бехках баьстина,
Вешин ц1ий дитинарш бахамца хьаьстина,
Яхь дешех хийцина,
Эхь даржах доьхкина,
Х1ун ларам лоьху ахь, сий долу Нохчий къам?
Сий долу хьайн к1ентий саз-лаьттах боьхкина, 1ожалло ларбинарш хьаннашка лаьхкина,
Айкхаллех герз дина,
Гамонех г1аг1 дина,
Х1ун толам лоьху ахь, сий долу Нохчийн къам?
Хьарамчу рицкъанах г1аланаш йоьттина,
Г1ийланиг, мисканиг халоне х1оттийна,
Хьайн берех бой дина,хьайн къаной къарбина,
Х1ун беркат лоьху ахь,
Сий долу Нохчийн къам? Г1азотехь кхелхинарш мостаг1ий кхайкхийна,
Ийманехь нисбелларш махкаха къахкийна,
Тезетах той дина,
Моттарг1ех дин дина,
Х1ун эхарт лоьху ахь,
Сий долу Нохчийн къам?!